小傳日記 | 亞洲四小龍鬥完經濟鬥生仔，星洲連環拳催生，香港仲有乜嘢計？

　　上世紀八十年代，內地才剛剛打開對外開放之門，亞洲四小龍已經閃耀全球，成為亞洲除了日本之外最具生命力嘅新興經濟體。當年四小龍在電子、成衣、鐘錶、玩具等輕工業產品鬥個你死我活。時至今日，四小龍發展漸漸分道揚鑣，有競爭也有互補。韓國和台灣在半導體各有千秋，香港和新加坡在金融發展亦各領風騷，不過喺同一領域卻殊途同歸，就係少人生仔！四小龍出生率持續下跌，全球經濟體之中齊齊墊底。

 

 

　　講起新加坡，當地出生率近年出現斷崖式下跌，2021年出生嬰兒數量仲有38672個，但到2025年迅速跌到得番29864名，四年間減幅約為22.8%，並創下新加坡自1965年建國以來，首次跌穿年出生3萬名嘅最低紀錄，難怪新加坡政府大為緊張，連環出重招「催生」。

 

　　有見及此，新加坡政府推出重磅育兒福利，喺現有16周母親產假與4周父親陪產假嘅基礎上，額外增加10周育兒假。而針對12歲孩童嘅帶薪育兒假將按子女數量分級計算，每位家長每年可享有8至12天假期，雙職夫妻每年最高合計可以休足24天。此外，每個新加坡公民子女出世第一年就可以收到1萬坡紙禮包、1萬坡紙兒童發展帳戶同5000坡紙嘅新生兒保健儲蓄，之後1至16歲每年可以收到2000坡紙現金津貼當利是，直到17歲就有機會收取1萬坡紙嘅高等教育補助金，加加埋埋累計可以獲得69500坡紙（約43萬港元）嘅直接資助！

 

　　新加坡政府可謂扭盡六壬，法寶盡出。反觀香港，政府通過高才通同放寬外勞呢兩大法寶補充勞動力，至於促進生育方面就著墨不多。例如喺產假方面，香港最多得14星期，低過新加坡16星期；而男士侍產假方面香港有5日，而新加坡就高達4星期；香港近年最為人熟悉嘅鼓勵生育政策，莫過於2023年推出嘅兩萬元生B（嬰兒）現金獎，不過呢項獎勵計劃只限三年，計下時間都差唔多到期，如果個B今年10月25日之後出娘胎報到，就無福消受呢兩萬蚊。

 

　　當然，政府還有一大堆「好睇唔好食」嘅政策，例如初生子女頭兩年雙倍免稅額，按揭或租金扣稅額，以及有初生B家庭輪候公屋期縮短一年，只不過前兩者要高收入人士才能受惠，而後者就針對低收入家庭，但坊間認為對刺激生育作用不大，試問有邊個會為咗免幾萬蚊稅去生仔，又有邊個會為咗早啲排到公屋去生仔？

 

　　根據本地金融機構做嘅調查同推算，現時在香港要養育一個孩子直到18歲，成本要花費600萬元，筆者就不以為然。還記得30年前奧運金牌得主李麗珊喺廣告講過，養大一個子女要花400萬元，以30年通脹來算，如今育兒總成本可能要過千萬！但將來嘅佢從返第一份工到退休，工資加埋都未必有一千萬，而即使真係賺得番，呢筆錢都只係啱啱好可以喺香港買到一套符合中產家庭標準嘅單位！

 

　　所以香港政府如果希望出生率止跌，除咗要學習星洲重錘出擊刺激生育，更重要係要維持安居樂業嘅預期，否則無論引入幾多內地或海外人才，佢哋過咗七年攞到身份證，最後都係要投奔他方，喺更宜居嘅城市生活，咁就真係為其他人作嫁衣裳喇，請請！

 

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。